දුෂ්කර අත්දැකීමක් ගැන තේරුම් ගැනීමට උත්සාහ කරන විට, ආරම්භ කළ යුත්තේ කොතැනින්දැයි නොදැනීම ඔබට මානසිකව බරක් විය හැකිය. සිදු වූ දෙයක් ගැන ඔබට ප්‍රශ්න තිබිය හැකියි. ඔබට දැනෙන දේ ගැන අවිනිශ්චිත බවක් තිබිය හැකියි. එසේත් නැතිනම්, ඔබ අත්විඳි දෙය ගැන සැලකිලිමත් විය යුතුදැයි ඔබට සිතෙන්නට පුළුවන. වෛද්‍ය ප්‍රතිකාර, උපදේශන සේවා, නීතිමය සහාය අවශ්‍යද, නැතිනම් තවත් තොරතුරු දැනගැනීම පමණක් ප්‍රමාණවත්ද යන්න ගැනත් ඔබට පැහැදිලි අදහසක් නොතිබිය හැකියි.
මේ සියලු ප්‍රශ්නවලට එකවර පිළිතුරු සොයාගත යුතු නැහැ. තොරතුරු සොයා බැලීම යනු ඔබ තීරණයක් ගත යුතු බව, ඔබේ අත්දැකීම වෙනත් කෙනෙකුට විස්තර කළ යුතු බව හෝ සූදානම් වීමට පෙර යම් පියවරක් ගත යුතු බව නොවේ. සමහර අවස්ථාවලදී පළමු පියවර වන්නේ ලබාගත හැකි දේ ගැන දැනුවත් වීම සහ ඔබට ඇති විකල්ප සලකා බැලීමට ඔබටම කාලය ලබාදීම පමණයි.
සියලු පිළිතුරු දැන්ම නොදැන සිටීම සාමාන්‍ය දෙයක්
දුෂ්කර අත්දැකීම්වලට මිනිසුන් ප්‍රතිචාර දක්වන ආකාරය එකිනෙකාට වෙනස් වේ. ඔබට කරදරයක් ගෙන දෙන දේ ගැන පැහැදිලි අවබෝධයක් තිබිය හැකියි. එසේත් නැතිනම්, ඔබට දැනෙන දේ වචනවලින් විස්තර කිරීම පවා අපහසු විය හැකියි. සමහරවිට ඔබ මිතුරෙකු වෙනුවෙන් තොරතුරු සොයනවා විය හැකියි. නැතිනම් සබඳතාවක් ගැන තේරුම් ගැනීමට හෝ අතීතයේ සිදු වූ දෙයක් පිළිබඳව පැහැදිලි අවබෝධයක් ලබාගැනීමට උත්සාහ කරනවා විය හැකියි.
ඔබට දැනිය යුත්තේ මෙයයි කියා නියමිත ආකාරයක් නැහැ. තොරතුරු සොයා බැලීම ආරම්භ කිරීමට ඔබේ අත්දැකීම විස්තර කරන පරිපූර්ණ වචන සොයාගැනීමටත් අවශ්‍ය නැහැ. ඒවායේ තේරුම තවමත් පැහැදිලි නොවුණත් ඔබට ප්‍රශ්න තිබිය හැකියි. වහාම නිගමනයකට එළඹිය යුතු නැතිව ඔබට අවිනිශ්චිත බවක් දැනෙන්නටත් පුළුවන.
ඔබට අවශ්‍ය සහාය කුමක්දැයි හෝ සහාය ලබාගැනීමට ඔබට අවශ්‍යදැයි තවමත් පැහැදිලි නැති වුවත්, ඔබට ඇති විකල්ප ගැන දැනුවත් වීම හොඳ ආරම්භයක් විය හැකියි.
ඔබට අවශ්‍ය කුමන සේවාවදැයි නොදන්නේ නම්?
විවිධ සහාය සේවා මඟින් විවිධ ආකාරයේ උපකාර ලබාදෙන අතර, ආරම්භ කළ යුත්තේ කොතැනින්දැයි සෑම විටම පැහැදිලි නොවිය හැකියි. එක් එක් සේවාවෙන් ලබාදෙන සහාය ගැන දැනගැනීමෙන්, වහාම තීරණයක් ගැනීමට බලපෑමක් නොමැතිව ඔබට ඇති විකල්ප සලකා බැලීමට හැකි වේ.
- වෛද්‍ය සහාය: සෞඛ්‍ය වෘත්තිකයන්ට තුවාල පරීක්ෂා කිරීමට, සෞඛ්‍ය ගැටලු පිළිබඳව සාකච්ඡා කිරීමට සහ ලබාගත හැකි ප්‍රතිකාර ගැන පැහැදිලි කිරීමට හැකියි.
- මානසික හා සමාජීය සහාය: උපදේශකයන්ට සහ මානසික සෞඛ්‍ය වෘත්තිකයන්ට ඔබේ හැඟීම් සහ මානසික පීඩාවන් ගැන කතා කිරීමටත්, ඔබට ගැළපෙන සහාය සොයා බැලීමටත් අවකාශයක් ලබාදිය හැකියි.
- නීතිමය සහාය: සුදුසුකම් ලත් වෘත්තිකයන්ට සහ අදාළ සංවිධානවලට ඔබේ නීතිමය අයිතිවාසිකම්, නීතිමය ක්‍රියාපටිපාටි සහ ඔබට ඇති විකල්ප පිළිබඳව පැහැදිලි කළ හැකියි.
- ප්‍රජා මට්ටමේ සහාය: සංවිධානයෙන් ලබාදෙන සේවාවන් අනුව, තොරතුරු, වෙනත් සුදුසු සේවා වෙත යොමු කිරීම් හෝ එදිනෙදා කටයුතු සඳහා ප්‍රායෝගික සහාය ලබාගත හැකියි.
තවත් තොරතුරු සොයා බැලීමට පෙර ඔබේ තත්ත්වයට ගැළපෙන සේවා වර්ගය තීරණය කිරීමට අවශ්‍ය නැහැ. ඔබට මුලින්ම විවිධ සේවා පිළිබඳව කියවා බලා, ඒවායින් කිසිවක් ඔබේ තත්ත්වයට අදාළදැයි සලකා බැලිය හැකියි.
ඔබට ඇති විකල්ප තේරුම් ගැනීමට තොරතුරු උපකාරී වන්නේ කෙසේද?
විශ්වාසදායක තොරතුරු මඟින් ඔබේ අත්දැකීම් ගැන වඩා හොඳ අවබෝධයක් ලබාගැනීමට, හානිකර විය හැකි හැසිරීම් හඳුනාගැනීමට සහ ඔබට ලබාගත හැකි සම්පත් ගැන දැනගැනීමට උපකාරී වේ. උදාහරණයක් ලෙස, කැමැත්ත සහ පෞද්ගලික සීමා පිළිබඳව කියවීමෙන්, ඔබට අපහසුතාවක් ඇති කළ සිදුවීමක් ගැන තේරුම් ගැනීමට හැකි විය හැකියි.
විශේෂිත සේවාවකින් අපේක්ෂා කළ හැකි දේ, ඔබට ඇසිය හැකි ප්‍රශ්න සහ අදාළ සංවිධානය සම්බන්ධ කරගන්නා ආකාරය ගැන ද තොරතුරු මඟින් දැනුවත් විය හැකියි. මේ විස්තර කලින්ම දැන සිටීමෙන්, ඊළඟට කළ හැකි දේ ගැන සිතා බැලීම පහසු විය හැකියි.
වැදගත්ම දෙය නම්, ඔබට ඇති විකල්ප ගැන දැනුවත් වීමෙන් කිසියම් සේවාවක් භාවිත කිරීමට ඔබ බැඳී නොසිටීමයි. ඔබට තොරතුරු කියවා, ඒ ගැන සිතා බලා, සූදානම් වූ විට නැවත ඒ වෙත පැමිණිය හැකියි. ඔබේ අවශ්‍යතා සහ තත්ත්වය අනුව ඔබට සුදුසු යැයි හැඟෙන දේ තීරණය කළ හැක්කේ ඔබටමයි.
ආරම්භ කිරීමට SafeHerSpace ඔබට උපකාරී වන්නේ කෙසේද?
ශ්‍රී ලංකාවේ ලිංගික සහ ස්ත්‍රී පුරුෂ සමාජභාවය මත පදනම් වූ ප්‍රචණ්ඩත්වයෙන් පීඩාවට පත් වූ පුද්ගලයන්ට විශ්වාසදායක තොරතුරු සහ සහාය සේවා පහසුවෙන් සොයාගැනීමට උපකාර කිරීමේ අරමුණින් SafeHerSpace නිර්මාණය කර ඇත. සම්බන්ධ කරගත යුත්තේ කුමන සංවිධානයද, තමන්ට ප්‍රයෝජනවත් විය හැක්කේ කුමන ආකාරයේ සහායක්ද යන්න නොදන්නා විට සුදුසු උපකාර සොයා ගැනීම අපහසු විය හැකි බව අපි හඳුනා ගනිමු.
අපගේ බහුභාෂා සම්පත් වේදිකාව හරහා සහාය ලබාදෙන සංවිධාන, මානසික සෞඛ්‍යය සහ සුවය ලැබීම සම්බන්ධ සම්පත් මෙන්ම ලබාගත හැකි සේවා පිළිබඳ තොරතුරු එකම ස්ථානයකින් සොයාගත හැකියි. අපගේ සම්පත් සිතියම සහ සේවා නාමාවලිය සකස් කර ඇත්තේ එක් එක් සංවිධානය වෙන වෙනම සොයා බැලීමට සිදු නොවී, ඔබට සහාය ලබාගත හැකි ස්ථාන ගැන එකම තැනකින් සොයා බැලීමට උපකාර වන පරිදියි.
SafeHerSpace සිංහල, දෙමළ සහ ඉංග්‍රීසි යන භාෂා තුනෙන්ම ලබාගත හැකියි. එමඟින් ඔබට තේරුම්ගත හැකි භාෂාවකින් තොරතුරු ලබාගැනීමට අවස්ථාව සැලසේ. ඔබ ඔබ වෙනුවෙන් තොරතුරු සොයනවා විය හැකියි. ඔබට සමීප කෙනෙකුට සහාය වීමට උත්සාහ කරනවා විය හැකියි. නැතිනම් තවත් දැනුවත් වීමට පමණක් කැමති විය හැකියි. ඒ කුමන අවස්ථාවක වුවත්, ඔබේ තත්ත්වයට අදාළ විය හැකි සම්පත් සොයා බැලීමට මෙම වේදිකාව භාවිත කළ හැකියි.
ඔබට අවශ්‍ය දේ හරියටම දැනගෙනම මෙහි පැමිණිය යුතු නැහැ. තොරතුරු කියවා බැලීමෙන්, විවිධ සේවා ගැන දැනුවත් වීමෙන් සහ ඊළඟ පියවරක් ගැනීමට ඔබට අවශ්‍යදැයි තීරණය කිරීමෙන් ආරම්භ කළ හැකියි.
ඔබට අවශ්‍ය වේගයෙන් ඉදිරියට යන්න
තොරතුරු සොයා බැලීමට පෙර පැහැදිලි සැලැස්මක් තිබිය යුතු නැහැ. ඔබට මිනිත්තු කිහිපයක් සේවා නාමාවලියක් පිරික්සීමට, විශේෂිත මාතෘකාවක් ගැන කියවීමට හෝ සූදානම් වූ විට නැවත කියවීමට අවශ්‍ය තොරතුරු සුරැකීමට හැකියි.
ඔබ සේවාවක් සම්බන්ධ කරගැනීමට තීරණය කළහොත්, පෞද්ගලික තොරතුරු බෙදාගැනීමට පෙර එම සේවාවෙන් ලබාදෙන සහාය, ඔබේ තොරතුරු රහසිගතව තබාගන්නා ආකාරය සහ අදාළ ප්‍රායෝගික අවශ්‍යතා ගැන විමසිය හැකියි. එම සේවාවෙන් ඔබට අවශ්‍ය සහාය ලබාදිය නොහැකි නම්, වෙනත් සුදුසු සේවාවක් නිර්දේශ කළ හැකිදැයි විමසීමටත් පුළුවන.
ඔබේ අන්තර්ජාල ක්‍රියාකාරකම් වෙනත් කෙනෙකු නිරීක්ෂණය කරනවා විය හැකි යැයි ඔබට බියක් තිබේ නම්, තොරතුරු සොයන විට ඔබේ ඩිජිටල් ආරක්ෂාව ගැනත් සැලකිලිමත් වන්න. ඔබේ අවදානම වැඩි නොකරන ක්‍රමයක් තෝරාගන්න. ඔබ ක්ෂණික අනතුරක සිටී නම්, වහාම උපකාර ලබාගන්න.
අද ඔබට දැනගැනීමට අවශ්‍ය දේ සමඟින් ආරම්භ කරන්න
තොරතුරු සොයා බැලීම ආරම්භ කිරීමට පෙර ඔබේ අත්දැකීමට නමක් දීමට, ඊළඟට සිදුවිය යුත්තේ කුමක්දැයි තීරණය කිරීමට හෝ ඔබට වඩාත් සුදුසු සේවාව කුමක්දැයි දැන සිටීමට අවශ්‍ය නැහැ. යම් ප්‍රශ්නයක් තිබීමත්, ඒ ගැන වඩා හොඳින් තේරුම් ගැනීමට අවශ්‍ය වීමත් ආරම්භ කිරීමට ප්‍රමාණවත්ය.
විශ්වාසදායක, පහසුවෙන් තේරුම්ගත හැකි සහ විනිශ්චයකින් තොර තොරතුරු ලබාගැනීමට සෑම කෙනෙකුටම අවස්ථාව තිබිය යුතු බව SafeHerSpace හි අපි විශ්වාස කරමු. ඔබට අවශ්‍ය වේගයෙන් විවිධ විකල්ප සලකා බැලීමට හැකි වන පරිදි, සහාය ලබාගත හැකි මාර්ග සොයා ගැනීම පහසු කිරීම අපගේ අරමුණයි.
ඔබට අවශ්‍ය සහාය කුමක්දැයි දැන්ම දැන සිටිය යුතු නැහැ. ලබාගත හැකි දේ ගැන දැනුවත් වීමෙන් ඔබට ආරම්භ කළ හැකියි. ශ්‍රී ලංකාවේ ලිංගික සහ ස්ත්‍රී පුරුෂ සමාජභාවය මත පදනම් වූ ප්‍රචණ්ඩත්වයෙන් පීඩාවට පත් වූ පුද්ගලයන් සඳහා ඇති තොරතුරු, සහාය සේවා සහ සුවය ලැබීමට උපකාරී වන සම්පත් සොයා බැලීමට SafeHerSpace වෙත පිවිසෙන්න. ඔබේ ඊළඟ පියවර ආරම්භ විය හැක්කේ එක් ප්‍රශ්නයකින් පමණයි. දැනට එය ප්‍රමාණවත්ය.