ඔබට හිතවත් කෙනෙකුට සහාය වීම

යම් කෙනෙකුත් ලිංගික හිංසනයක් හෝ SGBV අත්දැකීමක් ඔබ සමඟ බෙදාගත් විට, විනිශ්චයකින් තොරව සවන් දීම වැදගත් සහායක් වෙන්න පුළුවන්.

• ඔබේ සම්පූර්ණ අවධානය ඔවුන්ට දෙන්න. ඔබේ දුරකථනය පැත්තකින් තියලා, කතා කරන්න හෝ ටික වේලාවක් නිහඬව ඉන්න ඉඩක් දෙන්න.
• ඔවුන් කැමති තරම්, නැත්නම් ටිකක් පමණක් බෙදාගන්න ඉඩ දෙන්න. ඔවුන් කතා කරන්න අකමැති විස්තර අහන්න එපා.
• ඔවුන් කියන දේ විශ්වාස කරන්න. සිදු වූ දේ ඔබ විමර්ශනය කරන්න, ප්‍රශ්න කරන්න, නැත්නම් සත්‍ය දැයි පරීක්ෂා කරන්න ඕනේ නැහැ.
• ඔවුන්ට කාලය දෙන්න. ඔවුන්ට විරාම අවශ්‍ය වෙන්න පුළුවන්. නැත්නම් මොනවාද කියන්න ඕනේ කියා හරියටම නොදැනෙන්න පුළුවන්.

පරිපූර්ණ පිළිතුරක් සොයාගන්න ඔබට ඕනේ නැහැ. සමහර විට ඔවුන් ළඟ ඉන්න එකම ප්‍රමාණවත්.

ලිංගික හිංසනයකින් පසු කෙනෙකුට සහාය වන විට, සරල සහ සැනසිලිදායක වචන ඔවුන්ට ඇසුණා කියාත්, සහාය ලැබුණා කියාත් දැනෙන්න උදව් වෙන්න පුළුවන්.

ඔබට මෙහෙම කියන්න පුළුවන්:

මේ පිළිතුරු, ඔවුන්ව විශ්වාස කරන බවත්, හිංසනයේ වගකීම ඔවුන්ගේ නොවන බවත්, ඊළඟට මොනවාද වෙන්නේ කියා තීරණය කරන්න ඔවුන්ට තවමත් ඉඩ තියෙන බවත් මතක් කරන්න පුළුවන්.

සමහර ප්‍රශ්න හෝ අදහස්, අපි හිතන්නේ නැතුව, ඔවුන්ව දොස් පැවරෙනවා වගේ, බල කෙරෙනවා වගේ, නැත්නම් ඔවුන්ගේ අත්දැකීම වැදගත් නැති වගේ දැනෙන්න හේතු වෙන්න පුළුවන්.

ඒ නිසා, මේවා මඟහරින්න උත්සාහ කරන්න:

• දොස් පැවරෙන ප්‍රශ්න, “ඔබ ඇයි එතන හිටියේ?” හෝ “ඇයි ඔබ එතනින් එළියට ආවේ නැත්තේ?” වගේ.
• ඔවුන් සූදානම් වෙන්න කලින් පැමිණිලි කරන්න, කෙනෙකුට මුහුණ දෙන්න, නැත්නම් යමක් කරන්න බල කිරීම.
• ඒ අවස්ථාවේ ඔවුන් වෙනස් විදිහකට ඇයි හැසිරුණේ නැත්තේ කියා අහන එක.
• “මීට වඩා නරක වෙන්න තිබුණා.” වගේ වචනවලින් සිදු වූ දේ කුඩා කර පෙන්වීම.
• ඔවුන්ගේ අත්දැකීම වෙනත් කෙනෙකුගේ අත්දැකීමත් සමඟ සංසන්දනය කිරීම.
• ඔවුන් කොහොම දැනෙන්න ඕනේද, නැත්නම් කොච්චර ඉක්මනින් සුවපත් වෙන්න ඕනේද කියා කීම.

හිංසනයට මුහුණ දුන් කෙනෙකුට සහාය වීම කියන්නේ ඔවුන්ගේ අත්දැකීමට ගරු කිරීමයි, ඔවුන් වෙනුවට ඔබ තීරණ ගන්න එක නෙවෙයි.

ඔබ ඔවුන්ගේ උපදේශකයා වෙන්න ඕනේ නැහැ. හැම දෙයම ඔබම විසඳන්නත් ඕනේ නැහැ.

ඔවුන්ට මානසික සෞඛ්‍ය සහාය, උපදේශනය හෝ වෙනත් වෘත්තීය සේවාවක් ගැන උනන්දුවක් තියෙනවා නම්, ඔවුන්ට තියෙන විකල්ප ගැන දැනගන්න ඔබට උදව් කරන්න පුළුවන්.

• තියෙන සහාය සේවා ගැන තොරතුරු බෙදාගෙන, සම්බන්ධ වෙනවාද නැද්ද කියා තීරණය කරන්න ඔවුන්ට ඉඩ දෙන්න.
• ඔවුන් සහාය විකල්ප බලනකොට ඔවුන් ළඟ ඉන්න වගේ ප්‍රායෝගික උදව් දෙන්න පුළුවන්.
• ඔවුන්ට උදව් වෙයි කියා හිතෙනවා නම්, හමුවකට ඔවුන්ත් එක්ක යන්න පුළුවන්.
• ඔවුන් කැමති භාෂාවෙන් හෝ ඔවුන්ට පහසු තැනක තියෙන සහාය සොයන්න උදව් කරන්න පුළුවන්.
• ඔවුන් තවම වෘත්තීය සහාය සොයන්න සූදානම් නැත්නම්, ඔවුන්ගේ “දැන් එපා” කියන එකටත් ගරු කරන්න.

ඔවුන් වෙනුවට තීරණය කිරීම නෙවෙයි අරමුණ. සහාය ලබාගන්න මාර්ගය ඔවුන්ට පහසු කිරීමයි.

හිංසනයට මුහුණ දුන් කෙනෙකු ගන්න තීරණ, ඔබ ගන්නවා කියා ඔබ හිතන තීරණවලට වඩා වෙනස් වෙන්න පුළුවන්.

ඒකත් කමක් නැහැ.

• උපදේශනය හෝ වෙනත් වෘත්තීය සහාය සොයනවාද කියා තීරණය කරන්න ඔවුන්ට ඉඩ දෙන්න.
• හිංසනය ගැන පැමිණිලි කරන්න හෝ නීතිමය පියවර ගන්න ඔවුන්ට බල නොකරන්න.
• තම අත්දැකීම කාටද කියන්නේ කියා ඔවුන්ගේ තීරණයට ගරු කරන්න.
• ඔවුන් ඔබ සමඟ බෙදාගත් දේ පුද්ගලිකව තබාගන්න. රහස්‍යභාවය හෝ ආරක්ෂාව ගැන ඔවුන් සමඟ කතා කළ යුතු විශේෂ හේතුවක් තිබේ නම්, ඒ ගැන ඔවුන් සමඟ විවෘතව කතා කරන්න.
• ඉක්මනින් සුවපත් වෙයි කියා බලාපොරොත්තු නොවී, කාලයත් සමඟ මෘදුව ඔවුන්ගේ තත්ත්වය ගැන විමසන්න.

සහාය කියන්නේ කෙනෙකුගේ තේරීම් ඉවත් කිරීම නෙවෙයි. ඔවුන්ට තවත් තේරීම් ලබාදීමයි.

ලිංගික හෝ ස්ත්‍රී-පුරුෂ සමාජභාවය මත පදනම් වූ හිංසනයකට මුහුණ දුන් කෙනෙකුට සහාය වීම ඔබටත් හැඟීම් මට්ටමින් බලපාන්න පුළුවන්.

ඔබට කනස්සල්ල, කෝපය, උදව් කරන්න බැරි බවක්, නැත්නම් මානසිකව ඉතා වෙහෙසක් දැනෙන්න පුළුවන්. මේ හැඟීම් කියන්නේ ඔබ වැරදි දෙයක් කරනවා කියා නෙවෙයි.

• ඔබට අවශ්‍ය වේලාවට විරාම ගන්න ඔබටම අවසර දෙන්න.
• ඔබට කරන්න පුළුවන් දේ සහ කරන්න බැරි දේ ගැන මෘදු සීමා තියන්න.
• ඔබටත් හැඟීම් සහාය අවශ්‍ය නම්, ඔබ විශ්වාස කරන කෙනෙකු සමඟ කතා කරන්න.
• කෙනෙකුට සහාය වීම ඔබේම යහපැවැත්මට බලපාන්න පටන් ගත්තොත්, වෘත්තීය සහාය ගැනත් සිතන්න.
• ඔබට කෙනෙකු ගැන ගැඹුරින් සැලකිලිමත් වෙන්න පුළුවන්. නමුත් ඔවුන්ගේ සම්පූර්ණ සුවපත්වීමේ වගකීම ඔබගේ නෙවෙයි කියා මතක තබාගන්න.

ඔබවත් බලාගැනීම, හැම දෙයම තනියම උසුළන්නේ නැතුව දිගටම ඔවුන්ට සහාය වෙන්න උදව් කරනවා.